Juan Luis Arsuaga paleontologoak “Cooperar para competir: la clave de la evolución social” izeneko hitzaldia eskaini du
Gaur, KOOPERATIBEN KONTSEILUAK aitortza erakutsi die Euskaditik mundu hobea eraikitzen mende erdi baino gehiago daramaten hogeita hamar euskal enpresa kooperatibori baino gehiagori.
2019an, jada, 50 urte baino gehiago egina zuten 69 enpresaren ibilbidea balioetsi zen. Bost urte hauetan euskal ekonomiarentzat ondare garrantzitsua duten enpresa kooperatibo gehiago batu dira, eta kooperatiba horiek izan dira gaur eguerdian Euskalduna Jauregian egindako ekitaldiko protagonistak, horiei egin baitzaie omenaldia, merezita.
Euskadik ibilbide luzea egina duten ehun enpresa kooperatibo baino gehiago ditu. Mende erdia baino gehiagoko historia duten kooperatibak dira, eta sektore oso ezberdinetakoak dira, industriakoak zein hezkuntzakoak, baita nekazaritzakoak edo kontsumokoak ere, eta zerbitzu sorta zabal batekoak ere bai. Heterogeneotasun horrek garbi uzten du edozein sektore gara daitekeela kooperatibaren figura juridikoaren pean.
Baina batez ere, lurraldean oso errotuta dauden enpresak dira, Patxi Olabarria KOOPERATIBEN KONTSEILUko presidenteak agerian utzi duen bezala. “Enpresa kooperatibo horiek ez dira deslokalizatzen, beren erabakiguneak hemen baitaude eta eraldaketa sozialarekiko konpromiso argia baitute”, adierazi du.
Kooperatibak, aldaketaren motorra
Ekitaldi hau KOOPERATIBEN KONTSEILUAk mugimendu kooperatiboaren aitortza soziala handitzeko duen konpromisoaren froga da, gure herriaren garapenari egiten dion ekarpenagatik aitortza sozial handiagoa behar duela uste baitu. “Kooperatibak aldaketa sozial, ekonomiko eta kulturalerako benetako motorra dira. Mundu honetan, non desberdintasunak gero eta gehiago diren, kooperatibek erakusten digute badagoela aberastasuna modu bidezkoagoan banatzerik, pertsonak beren jardueraren erdigunean jarriz”, adierazi du Patxi Olaberria KOOPERATIBEN KONTSEILUko presidenteak.
Ekitaldian Mikel Torres Bigarren Lehendakariorde eta Ekonomia, Lan eta Enplegu Sailburua egon da, baita Euskadiko beste agintari eta kooperatiba eta enpresa munduko beste ordezkari batzuk ere.
Aitortza horren osagarri, KOOPERATIBEN KONTSEILUAk Juan Luis Arsuaga paleontologo ezaguna gonbidatu du bere ikuspegia azal dezan; izan ere, haren ustez, lankidetza ez da soilik giza balio bat, gure bilakaera eta gizateriaren historia ulertzeko funtsezko gako bat ere bada. “Cooperar para competir: la clave de la evolución social” izeneko hitzaldia eman du, eta bertan lankidetzaz hitz egin du, nola lankidetzak kooperatibismoaren iragana, oraina eta etorkizuna bultzatu duen azaltzeko.
Argazki-albuma: argazkiak.
